Keshilli i Ministrave

Qeveria, me propozim dhe miratim nga vetë kryeqeveritari Sali Berisha ka zhvilluar një mbledhje urgjente në orën 4.00 të mëngjesit. Mësohet se prej disa netësh kryeministrin nuk e zë gjumi pa folur me Dritan Priftin dhe meqënëse zakonisht ky i fundit e merr në telefon nga ora katër e mëngjesit, kreu i qeverisë e pret deri në atë ore.

I shqetësuar nga fakti që Prifti nuk e ka marre në telefon në orën e zakonshme, kryeministri ka thirrur ne zyrën e tij të gjithë kabinetin e Këshillit të Ministrave.org.

Aty është marrë vesh se kryeministri ka vendosur të heqë ligjin për moratoriumin e skafeve. Të përgjumur, ministrat kanë kujtuar fillimisht se kryeministri do ti kompensonte lekët e kafeve dhe janë shprehur të gjithë dakord.

I pari që ka kundërshtuar ka qenë ministri Bode, të cilin nuk e kishte zënë gjumi dhe ishte mjaft i kthjellët  si ujët e një burimi, ndryshe nga të tjerët që ishin të turbullt si ujërat e një lumi që ka dalë nga diga dhe mbush rrugët e një qyteti.

Bode i ka kujtuar kryeministrit se ligji për ndalimin e mjeteve motorike ishte pikërisht ai që i duhej qeverisë në këto ditë të vështira, duke i kujtuar shefit te tij se vetëm gjatë ditëve të përmbytjeve Policia Kënetare kishte derdhur në buxhetin e shtetit mbi 100 milion leke, të cilat i kishin arkëtuar duke u vënë gjoba qindra skafeve që evakuonin banorë nga zonat e përmbytura duke shkelur të gjitha rregullat e qarkullimit skafor.

Këtu Berisha i ka shprehur Bodes, ankesat e kryekuvendares Topalli pasi skafi që e shoqëronte në vizitat e saja në Shkodër kishte marrë shumë gjoba sidomos në një moment të tillë kur ajo ka marrë vendim të dhurojë rrogën e saj në ndihmë të banorëve, duke ndjekur shembullin e kryeshefit të qeverisë.

Meqënëse ra fjala, rroga e Jozefinës ende nuk u ka vajtur banorëve pasi për një vendim kaq të rëndësishëm duhen 140 vota në parlament por bojkoti i opozitës e ka penguar të kontribuojë në të mirën e votuesve të saj.  

Kundërshtimin e Bodes e ka mbështetur edhe nënkryeministri Ilir Meta i cili heqjen e ligjit të skafeve e kishte edhe premtim elektoral. Meta do ta shfuqizonte ligjin sapo të bëhej kryeministër, por meqë nuk ja doli dot, endrra për heqjen e ligjit mbeti në sirtarin e Berishës

Berisha që u ka treguar të gjithë ministrave se kishte patur një vegim, ku kishte dëgjuar zvrin e njërit nga aktorëve të serialit “Të gjithë lumenjtë rrjedhin” dhe e kishte paralajmëruar se lumenjtë tanë do të rridhnin lumë edhe për tre vitet e ardhshme.

Zëri (jo i Popullit) që i vinte nga lart e ka këshilluar kryeministrin që të lejonte skafet, gomonet, komardaret, dyshekët e plazhit dhe lodrat me fryrje për fëmijë.

Për të miratuar vendimin e tij, dhe për ti bërë qejfin Bodes dhe Metës, ai ka urdhëruar që për tre vjet në zonat e përmbytura të lejohen vetëm skafet ngjyrë blu ose ngjyrë integrimi, ndërsa ato që mbajnë ngjyrat e aleanco-punistëve të ndalohen, të konfiskohen, tu cahen gomonet dhe të gjobiten.

NënKryeministri Meta tepër i kënaqur për realizimin e endrrës së tij shekullore ka ftuar kolegët e tij të pinë një gotë raki aleance Made in Skrapari tek klubi poshtë zyrave të LSI por Berisha i ka thënë që nuk është momenti për qejfe.

Gjithsesi kjo dolli me raki aleance mbetet në axhendën e mbledhjeve të qeverisë, u shpreh Meta.